பிக் டிக்கெட் லாட்டரி: இந்தியருக்கு ரூ.18 கோடி பரிசு

துபாய்: நைஜீரியாவில் வசிக்கும் இந்தியருக்கு அபுதாபி பிக் டிக்கெட் லாட்டரி மூலம் ரூ.18 கோடி பரிசு கிடைத்துள்ளது.
ஆப்பிரிக்க நாடான நைஜீரியாவில் கேரளாவைச் சேர்ந்த டிக்ஸன் கதிரா ஆபிரஹாம் பணியாற்றி வருகிறார். இவர் அபுதாபி சர்வதேச விமான நிலையத்தில் பிக் டிக்கெட் லாட்டரி டிக்கெட் வாங்கியுள்ளார்.
அந்த லாட்டரி டிக்கெட்டுக்கான குலுக்கல் பரிசு ரூ.18 கோடி டிக்ஸனுக்குக் கிடைத்துள்ளது. ஞாயிற்றுக்கிழமை நடைபெற்ற குலுக்கலில் மொத்தம் 9 பேர் பரிசு பெற்றனர். அவர்களில் 5 பேர் இந்தியர்கள் ஆவர். மற்றவர்களில் 3 பேர் பாகிஸ்தானையும் ஒருவர் ஐக்கிய அரபு அமீரகத்தையும் சேர்ந்தவர்கள்.
அக்டோபரில் அபுதாபி லாட்டரி மூலம் 8 இந்தியர்கள் பரிசு பெற்றனர். ஜனவரியில் இந்தியருக்கு 1.20 கோடி திர்ஹாம் பரிசு கிடைத்தது. ஏப்ரலில் கேரளாவைச் சேர்ந்த டிரைவர் ஒருவருக்கு 1.20 கோடி திர்ஹாம் பரிசு கிடைத்தது.