சென்னையில் 64 பெண் தெய்வங்களின் ஓவியக் கண்காட்சி தொடக்கம் | 64 Goddesses Drawing Exhibition Begins at Chennai

கண்காளி அறக்கட்டளை சார்பில் 64 பெண் தெய்வங்களின் ஓவியக் கண்காட்சி சென்னையில் நேற்று தொடங்கி செப். 1-ம் தேதி வரை 5 நாட்கள் நடைபெறுகிறது.

கண்காளி அறக்கட்டளை சார்பில் ‘ஏகா தி ஒன்’ என்ற தலைப்பில், ‘பெண்களை மேம்படுத்தினால் மனிதநேயம் மேம்படும்’ எனும் கருப் பொருளுடன் 64 யோகினிகளின் (பெண் தெய்வங்கள்) ஓவியக் கண்காட்சி சென்னை ஆழ்வார்ப்பேட்டை, எல்டாம்ஸ் சாலையில் உள்ள ‘மை பங்களா’ வில் நேற்று தொடங்கியது. இந்த நிகழ்ச்சிக்கு, கண்காளி அறக்கட்டளை தலைவர் எஸ்.பீனா உன்னிகிருஷ்ணன் தலைமை தாங்கினார். 5 நாட்கள் நடைபெறும் இந்த கண்காட்சியில், சாரதா மடத்தின் துறவி மாதாஜி பிரவ்ராஜிகா தர்மாத்மா ப்ரானா, பல்வேறு துறைகளை சேர்ந்த பெண் தொழில் முனைவோர், பள்ளி, கல்லூரி மாணவர்கள் கலந்து கொண்டனர்.

இந்த கண்காட்சியில், பீனா உன்னி கிருஷ்ணன் வரைந்த தாரா, நர்மதா, யமுனா, சாந்தி, வருணி, ஷேம்காரி, ஐந்த்ரி, வாராஹி, ரன் வீரா உள்ளிட்ட 64 யோகினிகளின் ஓவியங்கள் இடம்பெற்றிருந்தன. இந்த 64 யோகினிகளின் ஓவியங்களை பெண் தொழில் முனைவோர், மாணவர்கள் கண்டு ரசித்தனர்.

இது குறித்து, பீனா உன்னி கிருஷ்ணன் கூறியதாவது: உலகில் சக்தி வாய்ந்த பெண் ஆற்றலை பிரதிபலிக்கும் தெய்வீக உருவங்கள் 64 யோகினிகள் ஆகும். இந்த யோகினிகள் தைரியம், அறிவு, படைப்பாற்றல் மற்றும் மகிழ்ச்சி போன்ற பல்வேறு குணங்களை குறிக்கின்றன. கண்காட்சியில் வைக்கப்பட்டுள்ள 64 யோகினிகளின் ஓவியங்களை வரையும் பணி 2015-ம் ஆண்டு தொடங்கி 2020-ல் நிறைவடைந்தது. தற்போது இந்த ஓவியங்களை பொதுமக்களுக்கு காட்சிப்படுத்தி வருகிறோம்.

அந்த வகையில், பெண் சக்தியை முதன்மைப்படுத்தி, அதனை கொண்டாடும் விதமாக இந்த கண்காட்சி சென்னையில் தொடங்கப்பட்டுள்ளது. மேலும், இந்த கண்காட்சி மூலம் ஆணும், பெண்ணும் சமம் என்ற கருத்தையும் முன் வைத்துள்ளோம். செப். 1-ம் தேதி வரை 5 நாட்கள் சென்னை யில் நடைபெறும் இந்த கண்காட்சியில் பல்வேறு துறையைச் சேர்ந்த பெண் ஆளுமைகள், திரைப் பிரபலங்கள், ஆன்மிக சொற்பொழிவாளர்கள் பலர் பங்கேற்கின்றனர். தொடர்ந்து, மத்திய பிரதேசம், ஒடிசா உட்பட 15 மாநிலங்களில் கண்காட்சி நடத்த திட்டமிட்டுள்ளோம். இவ்வாறு அவர் கூறினார்.